الجزيري
عبدالله محمد خير
الجزيري بقت مخادة
وتانى ختت طين زياده
السواقي البى الغرب طلعت قصادا
وفى ضهاري الرمله الناس زرعت مقادا
الجرف سبروقو ملَّح
والبحر فات منو روَّح
قام و لبس التوب وسرَّح
من بعيد بى إيدو لوَّح
قالوا مندلِّين يشوفوا
كل زول ينـزل جروفو
الجرف بالخصبه رجَّح
وللبذور الطيبة نَّجح
فى الأصيل قمريهو يصدح
لى نعيمو وخيرو يمدح
داك يسلك وداك ينقح
وداك بالشرقية ينبح
جاى دافر القش متمسح
مرة يغطس ومره يطفح
التبش نوارو فتَّح
والدخن قندولو دندح
خدَّر الشتل المصفَّح
جاب قلوب لى اهلو فرَّح
